Skýrsla stjórnar Lögfræðingafélags Íslands
fyrir aðalfund 20. maí 2026

1.    Fundargerð aðalfundar LÍ 27. maí 2025

Fundurinn var boðaður með tveggja vikna fyrirvara eins og lög gera ráð fyrir með tölvupósti á félagsmenn þriðjudaginn 6. maí 2025 og með auglýsingu á heimasíðu LÍ. 

Hjördís Halldórsdóttir formaður bauð fundarmenn velkomna og stakk upp á Dögg Pálsdóttur sem fundarstjóra og Margréti Hauksdóttur sem fundarritara. Það var samþykkt. Fundarstjóri fór yfir að löglega hafi verið boðað til aðalfundarins skv. 7. gr. laga félagsins. 

1.    Skýrsla stjórnar. 
Hjördís Halldórsdóttir formaður fór yfir skýrslu stjórnar á starfsárinu 1. apríl 2024 til 31. mars 2025.

2.    Endurskoðaðir reikningar lögfræðingafélags Íslands og Tímarits lögfræðinga lagðir fram.  
Bryndís Helgadóttir gjaldkeri fór yfir reikninga LÍ og Kjartan Bjarni Björgvinsson framkvæmdastjóri TL yfir reikninga TL.

Umræður um skýrslu stjórnar og reikninga félagsins og TL: Fyrirspurn kom fram hvort félagsmaður með aukaaðild hafi atkvæðisrétt á fundinum. Með vísan til 3. mgr. 7. gr. laga félagsins var það talið svo vera. Reikningarnir voru samþykktir.

3.    Kosning stjórnar og varastjórnar.
Tillaga um nýja stjórn: 
Stjórn gerir að tillögu sinni: 

Formaður: Hjördís Halldórsdóttir Varaformaður: María Rún Bjarnadóttir Meðstjórnendur: Ásthildur Valtýsdóttir, Dagmar Ösp Vésteinsdóttir, Hafsteinn Þór Hauksson, Oddur Ástráðsson og Oddur Þorri Viðarsson.

Varamenn í stjórn:  Bryndís Helgadóttir og Hafsteinn Dan Kristjánsson.

4.    Kosning tveggja endurskoðenda og tveggja varamanna.
Stjórn gerði tillögu um eftirfarandi, sem var samþykkt:
Steinunn Guðbjartsdóttir og Benedikt Bogason. 
Ingiríður Lúðvíksdóttir og Lára V. Júlíusdóttir.

5.    Tillaga til lagabreytinga
Í fundarboði aðalfundar var þess sérstaklega getið að tillaga til lagabreytingar yrði tekin til meðferðar á aðalfundi og efni hennar var lýst.

Stjórn leggur til breytingu á 13. gr. laga LÍ, sem segir: „Reikningsár félagsins er frá 1. apríl til 31. mars“ og hún verði svohljóðandi: „Reikningsár er frá 1. janúar til 31. desember.“

Samkvæmt 2. mgr. 14. gr. laga félagsins verða tillögur ekki teknar til endanlegrar afgreiðslu nema helmingur félagsmanna hið fæsta sæki aðalfundinn. Svo er ekki, svo stjórn var falið að efna til framhaldsaðalfundar og boða til hans með sama hætti og til aðalfundar og tillaga til lagabreytingar þar verði borin fram til endanlegrar afgreiðslu, sbr. 3. mgr. 14. gr.

6.    Önnur mál
a.    Ákvörðun félagsgjalda fyrir yfirstandandi ár.  Stjórnin leggur til að árgjaldið verði hækkað í kr. 7.900 kr. Fyrir ári síðan var  það hækkað í kr. 6.900,  en þá hafði það verið kr. 5.900 frá árinu 2018. Samkvæmt neysluvísitölu væri sú upphæð rúmlega kr. 8.500 í dag. Tillagan um hækkun í kr. 7.900 var samþykkt.
b.    Fundarstjóri þakkaði fráfarandi stjórnarmönnum, þeim Kjartani Bjarna Björgvinssyni og Bryndísi Helgadóttur, sem reyndar hættir í stjórn en tekur sæti sem varamaður í stjórn, fyrir góð störf.

10 félagsmenn mættu á fundinn. 
Fundargerð ritaði Margrét Hauksdóttir

2. Almenn stjórnarstörf starfsárið 2025-2026

Hjördís Halldórsdóttir var kosin formaður á aðalfundi 2025 og María Rún Bjarnadóttir varaformaður. Á fyrsta fundi skipti stjórnin með sér störfum þannig að gjaldkeri er Oddur Þorri Viðarsson, framkvæmdastjóri Tímarits lögfræðinga er Hafsteinn Þór Hauksson, ritari er Dagmar Ösp Vésteinsdóttir og meðstjórnendur eru Ásthildur Valtýsdóttir og Oddur Ástráðsson.  Á starfsárinu voru haldnir níu stjórnarfundir. 

3. Skrifstofa, framkvæmdastjórn og einstök verkefni

Margrét Hauksdóttir lét af störfum sem framkvæmdastjóri Lögfræðingafélagsins í ársbyrjun 2026. Við starfinu tók Anna Ragnhildur Halldórsdóttir, lögfræðingur. Starfið felur í sér 50% starfshlutfall. 

Félagsmenn LÍ voru 17. maí 2025 alls 1445 (1466). Allir sem verða 65 ára á árinu verða sjálfkrafa félagar í öldungadeild en félagar voru 287(240). Félagar í FLF - Félagi lögfræðinga í fyrirtækjum voru 158 (154), í Áorku, áhugafélagi um orkurétt 126 (128), í Höfundaréttarfélaginu 99 (98), í Skattaréttarfélaginu 94 (90) og í áhugahópi um tæknirétt 142 (143), í Vinnuréttarfélaginu 104 (99). Félagsmenn með aukaaðild eru 12 (21), en þeir uppfylla ekki menntunarkröfur um fulla aðild, sem er meistaragráða í lögfræði.

Áskrifendur að prentuðu Tímariti lögfræðinga eru 280 (282) en þar af eru 163 (165) félagsmenn í LÍ. Boðið er upp á rafrænar áskriftarleiðir í gegnum heimasíðu TL og í gegnum Fons Juris.

113 (102) er áskrifandi að rafrænni útgáfu TL í gegnum vefverslun og/eða Fons Juris en áskriftarverð fer eftir fjölda lögfræðinga á stofu eða í stofnun. Þá eru 1944 (1941) notendaígildi að TL í gegnum Fons Juris.

4. Fundir og ferðir
Alls voru haldnir þrír (sex) viðburðir, auk Lagadags, og tóku alls 722 (1078) manns þátt í viðburðunum. 

4.1    Fundir

Þann 3. september 2025 hélt Lögfræðingafélag Íslands ráðstefnu um opinber innkaup í samstarfi við ISAVIA, Lagastoð lögfræðiþjónustu og norsku lögmannsstofuna Arntzen Grette. Tilgangur ráðstefnunnar var að lögfræðingar og aðrir sérfræðingar sem vinna að opinberum innkaupum gætu borið saman bækur sínar og fengið fréttir af því nýjasta sem væri á seyði, bæði á Íslandi og erlendis. Flutt voru erindi frá Fjármála- og efnahagsráðuneytinu, Borgarlögmanni, Fjársýslunni, kærunefnd útboðsmála, FSRE og ISAVIA, Samtökum iðnaðarins, Arntzen Grette og Lagastoð. 

Mikil aðsókn var að ráðstefnunni, en hana sóttu 151 gestir. Fundarstjóri var Margrét Gunnarsdóttir, lögmaður hjá Arntzen Grette. 
Þann 12. desember 2025 stóðu Lögfræðingafélag Íslands og Lögmannafélag Íslands fyrir jólahádegisverðarfundi um störf lögfræðinga á erlendri grundu.  Á fundinum, sem 76 manns sóttu, fjölluðu um störf sín erlendis, ásamt því að ræða m.a. hvernig íslenskt lögfræðipróf hefði nýst þeim, þau Guðrún Olsen, forstöðumaður stefnu og umbreytinga hjá Icelandair og sem áður starfaði sem lögmaður hjá NJORD Law Firm og sem verkefnastjóri hjá Boston Consulting Group í Kaupmannahöfn, Dr. Hafsteinn Dan Kristjánsson, lagaprófessor við Háskólann í Reykjavík og Stipendiary Lecturer við Balliol College, Oxford háskóla, og Margrét Gunnarsdóttir, lögmaður á norsku lögmannsstofunni Arntzen Grette í Osló, en hún er fyrsti Íslendingurinn sem fékk útgefin norsk lögmannsréttindi á grundvelli íslenskra réttinda. 
Að ofangreindum erindum loknum kynnti Ragnar Jónasson, lögfræðingur og rithöfundur, og las upp úr bók þeirra Katrínar Jakobsdóttur rithöfundar og fyrrverandi forsætisráðherra, Franska spítalanum. 
Fundarstjóri var Stefán A. Svensson lögmaður og formaður Lögmannafélags Íslands.  
Hinn 8. apríl  2026 efndu Lögfræðingafélagið og Tímarit lögfræðinga til hátíðarmálþings í tilefni af því að 1. mars voru liðin 75 ár frá útgáfu fyrsta tölublaðs Tímarits lögfræðinga. Benedikt Bogason, forseti Hæstaréttar, flutti ávarp, Valgerður Sólnes, prófessor við Háskóla Íslands flutti tölu um sögu Tímarits lögfræðinga og Sindri M. Stephensen, héraðsdómari og ritstjóri Tímarits lögfræðinga ræddi um rannsóknir á vettvangi tímaritsins, stöðu þess og horfur. 
Fundarstjóri var Hafsteinn Þór Hauksson, dósent og framkvæmdastjóri Tímarits lögfræðinga og fyrrverandi ritstjóri þess. Hátíðarmálþingið sóttu um 35 manns og var boðið upp á léttar veitingar að því loknu.

4. 2    Lagadagur

Lagadagurinn var haldinn í 17. sinn á Hilton Reykjavík Nordica föstudaginn 10. október 2025. Að þessu sinni var boðið upp á aðalmálstofu að morgni, þrjár málstofur milli kl. 13.00-14.30 og þrjár málstofur milli kl. 15.00-16.00. Allar málstofurnar var einnig hægt að sækja í fjarfundi. Um kvöldið  var hátíðarkvöldverður, skemmtun og dansleikur.

Aðalmálstofan bar heitið: Lýðræði á tímamótum. Málstofurnar eftir hádegi voru:

I.    Þrítugur EES-samningur – nægjanlega sveigjanlegur í síbreytilegum heimi?
II.    Aðild brotaþola að sakamálum
III.    Vinnumarkaðsmódelið – hvað þarf til að félag geti talist stéttarfélag í skilningi laga? 
IV.    Hvað eru góð lög?
V.    Af vettvangi fjölskylduréttar: Er sanngjarnt að halda lífeyrisréttindum hjóna utan fjárskipta? 
VI.    „Sannleikurinn er fyrsta fórnarlambið“ – fjórða valdið á tímum falsfrétta og upplýsingaóreiðu – rökstólar.
Í hádeginu var „street food“ stemning og um kvöldið var hátíðarkvöldverður þar sem Bergur Ebbi var veislustjóri. Endað var með dansleik með hljómsveitinni Babies fram á rauða nótt. 

Að þessu sinni tóku  34 (31) lögfræðingar og aðrir sérfræðingar þátt í málstofum Lagadagsins en
alls sóttu 460 (558) manns einhvern viðburðanna sem í boði voru yfir daginn og af þeim 252 (350) um kvöldið.

Fulltrúar Lögfræðingafélagsins að undirbúningi Lagadagsins voru Oddur Ástráðsson, lögmaður og  Oddur Þorri Viðarsson, héraðsdómari auk Margrétar Hauksdóttur framkvæmdastjóra. Fulltrúar Lögmannafélags Íslands voru þær Dagmar Helga Einarsdsóttir, lögmaður og Bergrún Elín Benediktsdóttir, lögmaður. Fulltrúar Dómarafélagsins voru Sigríður Rut Júlíusdóttir, héraðsdómari og Finnur Þór Vilhjálmsson, héraðsdómari.

4. 3    Námsferðir
Haldið var í námsferð til Póllands dagana 5. – 15. september 2025. Fræðadagskrá fór fram í Varsjá, þar sem dvalið var í sex daga, og fól hún í sér heimsókn í neðri deild þjóðþings Póllands, heimsókn í sendiráð Íslands, til lögmannasamtaka Póllands og Hæstaréttar. 

Að lokinni fræðadagskránni var haldið til Krakár, næststærstu borgar landsins, sem er á heimsminjaskrá UNESCO. Þar var dvalið í fjóra daga og farið í skoðunarferð í saltnámuna í Wieliczka. Loks var farið í skoðunarferð til Auschwitz með leiðsögn.

Fullskipað var í ferðina, samtals 61 í hópnum. Í ferðanefnd voru Benedikt Bogason forseti Hæstaréttar, Kristján Andri Stefánsson sendiherra og Hjördís Halldórsdóttir lögmaður og formaður LÍ, og nutu þau aðstoðar Margrétar Hauksdóttur þáverandi framkvæmdastjóra og Sendiráðs Íslands í Varsjá við margvíslegan undirbúning. 

5. Útgáfustarfsemi
Lögfræðingafélagið sendir félagsmönnum reglulega tölvupósta þar sem auglýstir eru þeir viðburðir sem í boði eru hverju sinni í samfélagi lögfræðinga. Einnig heldur félagið úti heimasíðu sem eftir endurnýjun á sl. árum hefur aukið hagræði fyrir félagsmenn um kaup á Tímariti lögfræðinga. Facebook síða félagsins er opin öllum, hvort sem þeir eru félagsmenn eða ekki. Um 1600 (1600) manns eru fylgjendur við síðuna og fylgjast þannig með öllu sem þar er sett inn. Einnig er félagið skráð á Linked-In. 

Sindri M. Stephensen hefur verið ritstjóri árganganna 2024 og 2025 og unnið hefur verið með það markmið stjórnar að TL hafi breiðari skírskotun út í lögfræðingasamfélagið. 

Líkt og fjallað var um í kafla 4.1. var 75 ára útgáfuafmæli Tímarits lögfræðinga fagnað með hátíðarmálþingi 8. apríl sl. Góður rómur var gerður að erindum sem þar voru flutt og almenn ánægja gesta með hátíðahöldin. 

Fyrstu 53 árgangar Tímarits lögfræðinga, eða til 2004, fást ókeypis á www.timarit.is en aðrir árgangar fást keyptir á skrifstofu eða í vefverslun á heimasíðu félagsins www.logfraedingafelag.is. Auk þess fást þau til sölu í gegnum vefinn www.Fonsjuris.is. 

6. Erlend samskipti
6.1 Norræn systurfélög
Árlegur fundur norrænu lögfræðingafélaganna var haldinn í Osló í september 2025. Framkvæmdastjóra gafst ekki svigrúm til að sækja fundinn vegna Póllandsferðar Lögfræðingafélagsins 5. – 15. september.

7. Undirdeildir Lögfræðingafélags Íslands
Undirfélög LÍ eru nú átta talsins og þau eru: Öldungadeild, FLF-félag lögfræðinga í fyrirtækjum, Áorka–áhugafélag um orkurétt, Höfundaréttarfélag Íslands, Skattaréttarfélag Íslands, áhugahópur um tæknirétt, Vinnuréttarfélag Íslands og Félag regluvarða.

Þetta form hefur gefist vel þar sem lítil áhugafélög hafa fengið ýmsa þjónustu s.s. varðandi félagaskrá og undirbúning funda og atburða. Allir sem eru í undirfélögunum þurfa að vera félagar í LÍ og samstarf sem þetta hefur víkkað út starfsemi félagsins og virkjað „grasrótina“ svo um munar. Öll aukafélögin eru með sérstaka síðu á heimasíðu Lögfræðingafélagsins þar sem hægt er að lesa lög eða samþykktir, hverjir sitja í stjórn og fleiri upplýsingar.  

7.1    Öldungadeild Lögfræðingafélags Íslands

Í öldungadeild Lögfræðingafélags Íslands eru nú 287 félagsmenn. Þeir voru 240 árið 2025 og 254 árið 2024, svo þeim hefur fjölgað aftur eftir örlitla fækkun milli áranna 2024 og 2025. Allir lögfræðingar, sem verða 65 ára á árinu eru sjálfkrafa skráðir í félagið og fá póst þar um í upphafi ársins. Ef þeir biðjast undan veru í deildinni er að sjálfsögðu orðið við því.

Aðalfundur öldungadeildar Lögfræðingafélagsins var haldinn í tengslum við aðalfund móðurfélagsins 27. maí 2025. Á aðalfundinum var Dögg Pálsdóttir endurkjörin formaður. Aðrir í stjórn voru kjörin: Guðríður Þorsteinsdóttir og Jónína Bjartmarz til tveggja ára. Othar Örn Petersen, og Sigríður Ólafsdóttir voru kosin til tveggja ára á aðalfundi 2024. Í varastjórn voru kjörnir Gestur Steinþórsson til tveggja ára en Ólafur Egilsson og Þorsteinn A. Jónsson voru kjörnir til tveggja ára á aðalfundi 2024. Engar breytingar urðu á skipan stjórnar frá starfsárinu á undan.

Stjórn hefur einungis haldið einn formlegan stjórnarfund á starfsárinu. Þess í staða hafa formaður og framkvæmdastjóri, sem og aðrir stjórnarmenn, verið í reglulegum samskiptum á starfsárinu vegna undirbúnings viðburða sem öldungadeildin hefur boðið félagsmönnum.

Stjórnin hefur boðið félagsmönnum þátttöku í nokkrum viðburðum á starfsárinu sem voru misvel sóttir. 

Starfsárið byrjaði með heimsókn á Bessastaði þriðjudaginn 24. júní 2025 þar sem forseti Íslands frú Halla Tómasdóttir tók á móti félagsmönnum. Dr. Magnús K. Hannesson lögfræðingur og sagnfræðingur hélt fróðlegt og áhugavert erindi um kórónu Íslands. Forseti Íslands ávarpaði félagsmenn og bauð upp á léttar veitingar. Við hæfi þótti að gefa embætti forseta Íslands gjöf í tilefni heimsóknarinnar. Upp kom sú hugmynd að gefa embættinu eintak af Lögfræðingatalinu. Það er hins vegar löngu uppselt og illfáanlegt. Félagsmaðurinn Jón Haukur Hauksson var svo elskulegur að bjóða fram sitt eintak til að gefa embættinu. Félagsmenn fengu að ganga um húsakynni á Bessastöðum og skoða. Heimsóknin var hin ánægjulegasta. Samtals 47 félagsmenn og makar fóru til Bessastaða. Dr. Magnúsi og Jóni Hauki eru færðar góðar þakkir fyrir þeirra framlag í þessari heimsókn.

Hafrannsóknarstofnun var heimsótt fimmtudaginn 26. febrúar 2026. Settur forstjóri Eggert Benedikt Guðmundsson tók á móti félagsmönnum, kynnti starfsemi stofnunarinnar, sem er til húsa við Hafnarfjarðarhöfn, og svaraði greiðlega öllum fyrirspurnum. Félagsmönnum var boðið upp á léttar veitingar. Samtals 10 félagsmenn mættu í Hafrannsóknarstofnun. Af óviðráðanlegum ástæðum þurfti að seinka heimsókninni um viku og við það fækkaði þátttakendum nokkuð.

Biskupsstofa var heimsótt fimmtudaginn 19. mars 2026. Biskup Íslands frú Guðrún Karls Helgudóttir tók á móti félagsmönnum ásamt biskupsritara Evu Björk Valdimarsdóttur og Drífu Hjartardóttur forseta Kirkjuþings. Forseti Kirkjuþings fór stuttlega yfir starfsemi þingsins. Síðan kynnti biskup starfsemi Þjóðkirkjunnar og ýmsar breytingar sem gerðar hafa verið síðustu misserin, m.a. breytt merki og útlit heimasíðu. Félagsmenn gengu um húsakynni Biskupsstofu að Borgartúni 26, þáðu góðar veitingar og miklar umræður urðu að kynningu lokinni. Heimsóknin var hin fróðlegasta en því miður var þátttaka í minnsta lagi, einungis fimm félagsmenn mættu. Átti veðrið væntanlega þar nokkra sök því það var með leiðinlegra móti og nokkrir félagsmenn afboðuðu sig á síðustu stundu.

Starfsárinu lauk með heimsókn til dóms- og kirkjumálaráðherra föstudaginn 8. maí 2026 í ráðuneyti hennar að Skúlagötu 4. Ráðherra og nýskipaður ráðuneytisstjóri Páll Winkel, tóku á móti félagsmönnum. Dóms- og kirkjumálaráðherra ávarpaði félagsmenn og ráðuneytisstjóri kynnti stuttlega skipulag og verkefni dóms- og kirkjumálaráðuneytisins. Fjörlegar umræður sköpuðust að kynningu lokinni meðan félagsmenn nutu þeirra veitinga sem fram voru bornar. Samtals mætti 21 félagsmaður í heimsóknina. Fleiri höfðu tilkynnt um komu sína en örfáir afboðuðu sig á síðustu stundu eins og alltaf virðis gerast.

Stjórnarkonan Jónína Bjartmarz hafði veg og vanda að milligöngu um heimsókn öldungadeildarinnar annars vegar til Bessastaða og hins vegar til dóms- og kirkjumálaráðherra. Stjórnin þakkar Jónínu innilega fyrir að koma á þessum heimsóknum.

Framkvæmdastjóri Lögfræðingafélags Íslands, Margrét Hauksdóttir, sem einnig hefur gegnt því hlutverki hjá öldungadeildinni, lét af störfum í byrjun árs 2026. Við starfi hennar tók Anna Ragnhildur Halldórsdóttir. Stjórn öldungadeildarinnar þakkar Margréti innilega fyrir hennar góðu störf fyrir deildina undanfarin ár og býður Önnu Ragnhildi hjartanlega velkomna til starfa. Stjórn öldungadeildarinnar væntir góðs af samstarfi við nýjan framkvæmdastjóra.

Stjórn er með ýmsar hugmyndir um viðburði á næsta starfsári. Fyrirhuguð er kynnisferð til Grindavíkur annað hvort í júní eða strax í byrjun hausts. Aðrir viðburðir sem stjórnin hefur rætt fyrir komandi starfsár verða jafnóðum kynntir. 

Stjórn öldungadeildar þakkar framkvæmdastjórum, fráfarandi og viðtakandi innilega fyrir samstarfið á starfsárinu og félagsmönnum fyrir þátttöku í þeim viðburðum, sem í boði hafa verið.

7.2 FLF - Félag lögfræðinga í fyrirtækjum
Í FLF eru nú 158 (154) félagar. Félagið sofnaði á tímum covid en í vetur tókst að lífga það aftur við. Á aðalfundi 9. janúar 2023 voru kosin í stjórn: Andrea Olsen (Frigus), Ásgeir Sigurður Ágústsson (Rapyd). Guðrún Jóna Guðmundsdóttir (Eimskip), Hanna Björt Kristjánsdóttir (Íslandsbanki) og Kristín Lára Helgadóttir (Veritas).  Varamenn voru kosin Magnús Már Leifsson (Kvika eignastýring) og Vilhjálmur Þór Svansson (Creditinfo). Kallað var eftir upplýsingum um starfsemi félagsins á starfsárinu, en engar hafa borist. 

7.3 ÁORKA– áhugafélag um orkurétt
Í ÁORKU eru 126 (128) félagar. Í stjórn eru Hilmar Gunnlaugsson formaður (Sókn lögmannsstofa), Elín Smáradóttir (OR), Kristín Haraldsdóttir (HR), Hanna Björg Konráðsdóttir (Orkustofnun) og Baldur Dýrfjörð (Samorka). Enginn fundur var á yfirstandandi starfsári.

7.4. Höfundaréttarfélag Íslands
Í Höfundaréttarfélagi Ísland eru 99 (98) félagar. Aðalfundur var haldinn 17. desember 2025 en auk hefðbundinna aðalfundarstarfa var Kristín Edda Frímannsdóttir, LL.M. og lögmaður með fræðsluerindi. Starfsfárið var að öðru leyti annasamt vegna undirbúnings fyrir Norræna höfundaréttarþingið sem haldið verður í Hörpu dagana 2.-4. september næstkomandi.

Í stjórn sitja eftirfarandi: Hjördís Halldórsdóttir formaður og Guðrún Björk Bjarnadóttir varaformaður. Meðstjórnendur: Tómas Þorvaldsson, Erla S. Árnadóttir og Rán Tryggvadóttir. Varamaður er Gunnar Guðmundsson. Í fulltrúaráði sitja: Anna Tómasdóttir, Brynja Halldórsdóttir, Halldór Birgisson, Veigar Margeirsson og Vera Sveinbjörnsdóttir.

 

7.5 Skattaréttarfélag Íslands 
Í Skattaréttarfélaginu er 94 (90) félagsmenn. Formaður þess er Ragnar Guðmundsson lögmaður en aðrir í stjórn eru Margrét Ágústa Sigurðardóttir, Unnur Bachmann, Vilmar Freyr Sævarsson og Ásgeir Skorri Thoroddsen. Varamenn eru Lísa Karen Yoder og Páll Jónsson. Engin starfsemi var á árinu.

7.6 Áhugahópur um tæknirétt
Á starfsárinu fjölgaði skráðum félögum aðeins í áhugahópi um tæknirétt og eru nú 142 (143) talsins. Stjórn hópsins er óbreytt frá fyrra starfsári en hana skipa Hörður Helgi Helgason lögmaður, Elfur Logadóttir lögfræðingur, Hafliði Kristján Lárusson lögmaður, Margrét Helga Kr. Stefánsdóttir lögmaður, Marteinn Áki Ellertsson lögfræðingur og Róbert Bender lögfræðingur. Engin starfsemi var á árinu.

7.7 Vinnuréttarfélag Íslands
Í Vinnuréttarfélagi Íslands eru 103 (99) félagsmenn. Markmið félagsins er að vinna að kynningu, umfjöllun og rannsóknum á sviði vinnuréttar, efla samskipti milli lögfræðinga sem starfa að vinnuréttarmálum, stuðla að útgáfu greina og rita um vinnurétt og vera þátttakandi í fjölþjóðlegu samstarfi vinnuréttarfélaga. Vinnuréttarfélagið gekk til liðs við Lögfræðingafélagið vorið 2023.
 
Þann 19. nóvember 2025 hélt Vinnuréttarfélagið hádegis- og aðalfund. Maj-Britt Hjördís Briem var kosin formaður til tveggja ára, Jón Sigurðsson og Valgeir Þór Þorvaldsson voru kosnir í stjórn og Elín Blöndal og Magnús Norðdahl voru kosin varamenn í stjórn. Lára V. Júlíusdóttir og Gunnar Björnsson viku úr stjórn og er þeim þakkað áralangt og gott starf í þágu félagsins. Að loknum aðalfundarstörfum fjölluðu Hrannar Már Gunnarsson lögfræðingur hjá BSRB og Lísbet Sigurðardóttir lögfræðingur hjá Viðskiptaráði um hvort afnema eigi áminningarskyldu í lögum um réttindi og skyldur opinberra starfsmanna og fylgdu líflegar umræður í kjölfarið.

7.8 Félag regluvarða
Félag regluvarða var stofnað 12. september 2023. Félagsmenn eru nú 40 (37). Tilgangur félagsins er að styrkja og efla tengsl regluvarða og skapa vettvang fyrir fræðslu þeim til handa. Í stjórn eru Berglind Guðmundsdóttir formaður, Halla Björgvinsdóttir, Jóhann Karl Hermannsson, Þórdís Bjarnadóttir og Erna Heiðrún Jónsdóttir. Varamenn eru Edda Guðrún Sverrisdóttir og Kári Ólafsson. Kallað var eftir upplýsingum um starfsemi félagsins á starfsárinu, en engar hafa borist. 

8. Annað
8.1 Mentorprógramm fyrir nýútskrifaða lögfræðinga
Mentorprógramminu, sem hófst þann 15. maí 2025, var fram haldið á starfsárinu. Fimm ungir lögfræðingar sóttust eftir mentor. Mun fleiri buðust til að vera mentorar, en eftirtaldir voru valdir í samræmi við áhugasvið umsækjendanna: Stefán Eíríksson útvarpssstjóri, Aron Thorarensen sérfræðingur, Glóey Helgudóttir Finnsdóttir skrifstofustjóri, Helga Þórisdóttir forstjóri og Regína Jensdóttir Evrópuráðslögfræðingur. Lögmannafélagið bauð í annað sinn upp á mentorprógramm og var samstarf milli félaganna með kynningarfund fyrir verkefnið sem var haldinn 14. maí 2025. Ráðgert var að lögfræðingarnir ungu myndu hitta mentora sína fjórum sinnum fram að áramótum. 

9. Í lokin 

Starfsárið hefur verið annasamt sem er til marks um hversu öflugt félag Lögfræðingafélag Íslands er. Fjöldamargir félagsmenn hafa komið að starfseminni, eins og ráða má af því sem rakið er í skýrslu þessari hér að ofan, og er þeim öllum færðar bestu þakkir fyrir sem og Margréti Hauksdóttur, sem lét af störfum sem framkvæmdastjóri félagsins á starfsárinu. Maður kemur í manns stað, og í stað Margrétar var ráðin Anna Ragnhildur Halldórsdóttir, lögfræðingur. Henni eru sömuleiðis þökkuð góð störf á starfsárinu og stjórnin hlakkar til áframhaldandi samstarfs við hana.

Svo virðist vera sem það sé óvenjulegt að lögfræðingar, óháð starfsstéttum, eigi  með sér sameiginlegt félag sem haldið er úti í sambærilegum tilgangi og á við um Lögfræðingafélag Íslands. Það er hins vegar tvímælalaust styrkur félagsins að það sé félag allra lögfræðinga, hvort sem þeir eru dómarar, fræðimenn, lögmenn, vinni í stjórnsýslunni eða í fyrirtækjum, og án þess að í starfið flækist hagsmunamál afmarkaðs hóps lögfræðinga. Á vettvangi félagsins kynnist fólk sem alla jafna ætti einungis í formlegum samskiptum, eða jafnvel engum, og í þeim tengslum felast mikil verðmæti, sem eru ekki síst gagnlegt í okkar daglegum störfum hvert á sínu sviði. Á þeim nótum er rétt að færa í orð að félagið má gera betur þegar kemur að því að virkja þá lögfræðinga sem starfa innan fyrirtækja, svo sem fjármálafyrirtækja, enda ljóst að þar fer stór hópur lögfræðinga sem hefur mikla fræðilega snertifleti innbyrðis. Félagið hefur áhuga á að ná betur til þess hóps. Lagadagurinn er kjörinn vettvangur til þess og vonandi verður það fyrr en síðar að hann verði nýttur í þessum tilgangi. Þá er það áhersluatriði innan stjórnar að ná sem best til ungra lögfræðinga og hefur félagið ákveðið að nýta afmæli Tímarits lögfræðinga í þessu skyni, með því að bjóða þeim lögfræðingum sem útskrifast á afmælisárinu upp á gjaldfrjálsa áskrift af því tilefni. 

Hjördís Halldórsdóttir formaður